Presidenti amerikan Donald Trump ka paralajmëruar homologun e tij Recep Tayyip Erdoğan “që mos të bëhet një budalla”.
Këtë të fundit Trump e thotë në kuadër të ofensivës turke ndaj kurdëve në veri të Sirisë. Sipas presidentit amerikan, historia rrezikon që ta quajë Erdogan-in “djall” nëse nuk tërhiqet nga plani në Siri. Ky është thelbi i një letre të bërë publike nga gazetarja amerikane e “Fox News”, Trish Regan, letër që thuhet se Trump ia ka dërguar Erdogan-it ditën kur Turqia filloi sulmet e saj në Siri.
“Mos bëj të fortin. Mos u bëj budalla”, i shkruan Trump – presidentit turk. “Jam munduar shumë që t’i zgjidh disa probleme tuajat. Mos e zhgënje gjithë botën. Mund të arrish një marrëveshje shumë të mirë”, thuhet në letër.
“S’do të duash të jesh përgjegjës për vrasjen e mijëra njerëzve. Dhe unë s’dua të jem përgjegjës për shkatërrimin e ekonomisë turke. Dhe kam për ta bërë”, thuhet me tej.
Kujtojmë se pasi Amerika vendosi të largohet nga Siria veriore, ku kishte bashkëpunuar prej kohësh me forcat kurde kundër ISIS-it, duke u garantuar mbrojtje nga Turqia, presidenti turk ndërmori një fushatë ushtarake kundër forcave kurde. Bombardimet nga ajri u ndoqën nga një pushtim nga toka, gjë që solli vrasjen e një politikaneje kurde, sulmin e një autokolone me gazetarë dhe largimin e 275 mijë banorëve nga shtëpitë e tyre. Për këto, OKB thotë se Turqia mund të mbajë përgjegjësi për krime lufte.
