Kryetarja e Lëvizjes Socialiste për Integrim, Monika Kryemadhi teksa komentoi situatën politike në vend, nuk la pa kritikuar edhe gazetarët, për të cilët tha se shumica e tyre ‘sulmojnë’ opozitën.
“Unë kam qenë në debate dhe pjesë më të madhe e harxhoj me analistë, po në asnjë vend të botës nuk gjen gazetarë pro qeverisë. Që rrit taksat, varfëron njerëzit, vetëm në Turqi kam parë, atje po”, tha Kryemadhi gjatë një interviste në “Fax News”.
Po ashtu, kryetarja e LSI-së foli dhe për kohën kur bashkëpunonte me kryeministrin Edi Rama. Sipas saj, shefi i qeverisë është i mirë për të “bërë muhabet tavoline”, ndërsa theksoi se ai nuk e njeh dorëheqjen.
“Unë e njoh zotin Rama shumë mirë, kam bërë disa fushata elektorale me të. Ai është shok shumë i mirë për të bërë muhabet tavoline. Dashje pa dashje strategjia e tij arriti aty ku kishte për të arritur dhe e çmontoi këtë vend. Në vend dhe me ndihmën tonë, me ndihmën infantile tonën. Sot po plaket shoqëria po venitet, arriti misionin që nuk e bënë në shekuj për Shqipërinë”, u shpreh Kryemadhi.
