Ish-deputeti i Partisë Demokratike, Klevis Balliu e ka cilësuar politik vendimin e gjyqtarit që caktoi masën e sigurisë “arrest me burg” për 3 protestuesit e Astirit, të cilët prej muajsh kundërshtojnë shembjen e ndërtesave të tyre.
Teksa ishte i ftuar në studion e “Ora News”, Balliu shtoi se asnjë deputet socialist i Tiranës nuk ka shkuar t’i takojë dhe të interesohet për banorët e ndaluar.
“Asnjë deputet socialist nuk ka shkuar për ti takuar. Më parë ka qenë Sajmir Tahiri dhe tani Blerina Gjylameti. Do ketë kohë policia e Shtetit të rrijë çdo ditë aty, sepse ne do jemi aty çdo ditë. Gjyqtari që i dënoi sot ka djalin në PS. Ka marrë vendim politik. Të ndalosh protesta është jo vetëm politik, por idelologjik dhe ideologjia e tyre është komunizmi’’, deklaroi Balliu.
Sa i përket protestës së radhës, ish-deputeti u shpreh se janë njoftuar organet e rendit, ndërsa shtoi se burgimi i “qytetarëve të ndershëm është çnjerëzor, me urdhër politik nga një regjim diktatorial”.
“Vetëm qytetarët janë në burg, Valdrin Pjetrin nuk e kemi në burg. Kjo do të thotë se ka rënë shteti, pikërisht për këtë arsye nuk hapen negociatat’’, tha mes të tjerash Klevis Balliu.
