Ish-presidenti Bujar Nishani komentoi raportin e Komisionit të Venecias për anulimin e datës së zgjedhjeve të 30 qershorit nga presidenti Ilir Meta.
Sipas Nishanit, në raport kishte dy mesazhe. I ftuar në emisionin “Pa Protokoll”, ai u shpreh se në një anë raporti i Venecias pohonte se Presidenti nuk kishte kryer shkelje të rëndë për shkarkim; ndërsa nga ana tjetër frazën “tejkalim kompetencash”, Nishani e cilësonte një argumentim politik.
“Unë e kam lexuar si qytetar i interesuar për zhvillimet. Mos prisni nga unë të bëj komente rreth komenteve të presidentit mbi disa komente të Komisionit të Venecias. Është e drejta e presidentit të mbajë qëndrimin e tij, por në gjykimin tim, presidenti ka shkuar te dy gjëra, që janë të rëndësishme, njëri është mesazhi i artikulimit ligjor brenda konturit, megjithëse unë kam pikëpamjen time, që nuk është strikt institucionale por mund të japë këshillë ligjore kur ia kërkon gjykata Kushtetuese.
Kemi një qëndrim ligjor ku thuhet se nuk ka vend për shkelje të rëndë për të shkarkuar Presidentin. Ka edhe një mesazh politik, që nuk duhet të dilte nga komisioni i Venecias. Komentimi se ka tejkaluar kompetencat është argumentim politik dhe jo ligjor”, deklaroi ish-presidenti.
