Kryetarja e LSI, Monika Kryemadhi, thotë se ndërkombëtarët nuk ishin dakord me vendimin e opozitës për të djegur mandatet, por sipas saj, më mirë të dënohet ajo dhe Basha sesa të përsëritet ’97-ta. Mjaft e vendosur, kryetarja e LSI-së deklaroi se më mirë të ‘paguajnë’ drejtuesit e partive, sesa të ketë shqiptarë të vrarë, e po kështu të ketë shpërngulje masive të popullsisë.
“SHBA nuk është dakord me rrugën tonë. Kanë qenë kundër djegies së mandateve, kundër bojkotit, të gjitha sepse e quajnë çështje precedenti. SHBA bashkëpunon me çdo qeveri, dhe SHBA do të vijojë marrëdhëniet me shqiptarët.
Ne drejtuesit e partive do paguajmë për këtë vendim që kemi marrë, por për ne do ishte më mirë që të dënohem unë e Basha për djegien e mandatave, sesa të kemi një ‘97 të dytë, të dënohen shqiptarët. Për ne është më mirë që të dënohemi ne, sesa të kemi shqiptarë të vrarë dhe të vijojë kjo shpërngulje masive e shqiptarëve”, tha Kryemadhi në emisionin “Provokacija” të Muç Nanos.
Më tej, kryetarja e LSI shtoi se nuk është penduar aspak për djegien e mandateve, pasi sipas saj, u vërtetua lidhja e Ramës me krimin. Ajo tha se Shqipëria ka shpërngulje masive, e ndërsa ekonomia është në krizë.
“Jo, është hequr perdja që ishte krijuar në sytë e ndërkombëtarëve. Shqipëria ka shpërngulje masive, ekonomia është në minimunim e saj dhe nuk mund të ishim fasadë. Të gjithë ne thonim që Rama është i lidhur me krimin. Nëse do hynim në zgjedhjet lokale, do finalizonim një proces zgjedhor, do i jepnim ndonjë bashki të humbur”, tha ndër të tjera Monika Kryemadhi.
