Ministri i Bujqësisë dhe Zhvillimit Rural, Bledi Çuçi, ka qenë i pranishëm në Selenicë, për të parë nga afër punimet që po kryhen, për mbrojtjen nga përmbytja e lumit Vjosë.
Ministria bën me dije se për këtë investim janë dhënë nga qeveria rreth 3 miliardë lekë, me qëllim ndërtimin e 8 peneleve mbrojtëse dhe një argjinaturë të re.
Sipas ministrisë, këto punime do të ndihmojnë për të frenuar përmbytjen dhe gërryerjen e tokave bujqësore, si dhe vërshimin e prurjeve të lumit në stacionin e ujit të pijshëm.
“Kjo është një nga ndërhyrjet më të mëdha në Lumin Vjosa. Janë duke u ndërtuar 8 penele mbrojtëse. Ky është një vend ku lumi mbyt dhe gërryen një pjesë të madhe të tokave bujqësore. Me investimin që po bëjmë, rreth 3 miliardë lekë, do të ndalojmë përfundimisht gërryerjen e tokave nga vërshimet e lumit. Veç kësaj kemi bërë edhe argjinaturën, e cila s’ka qenë më parë. Në këtë mënyrë garantojmë edhe mbrojtjen nga përmbytja të stacionit të ujit të pijshëm për Selenicën. Ky është një nga investimet më të mëdha që po bëjmë në Vjosë. Besoj brenda muajit nëntor do ta përfundojmë investimin”, u shpreh Çuçi.
