Një incident ka ndodhur sot teksa deputetja Rudina Hajdari ndodhej në shkollën “Shejnaze Juka” në Shkodër. Teksa Hajdari mori fjalën para nxënësve, një i ri është ngritur dhe iu drejtua ashpër duke i thënë se ishte “shtojcë e Edi Ramës”.
“Shko pas Edi Ramës, Shkodra është e PD-së. Ti je turpi i Shkodrës. A e njeh ti Azem Hajdarin? Ai ka luftuar për të sjellë demokracinë, ti je duke kthyer komunizmin, shtojcë e Edi Ramës, je turpi i shqiptarëve…”
Deputetja gjatë incidentit ruajti qetësinë, në një moment i ofroi edhe mikrofonin të riut, i cili në të vërtetë nuk ishte një nxënës i shkollës. Këtë gjë e konfirmoi edhe drejtori i shkollës “Shejnaze Juka”.
Sipas organizatorëve të aktivitetit, i riu ka pretenduar se është gazetar. Dhe për këtë arsye është lejuar të futet në ambientet e brendshme. Në të vërtetë, i riu quhet Fatjon Mani dhe është anëtar i Forumit Rinor të Partisë Demokratke në qytetin e Shkodrës.
Pas incidentit reagoi edhe deputetja Rudina Hajdari, e cila tha se të tilla incidente ndodhin dhe se nuk e shqetësojnë.
“Jam te shkolla “Shejnaze Juka” jemi për të festuar hapjen e kësaj shkolle. Patjetër që incidente ka gjithandej. Kjo nuk është një gjë që na shqetëson. Infrastruktura e shkollës është shumë e dobët. Cilësia e arsimit ka rënie. Duhet të bëhet më shumë për infrastrukturën, për cilësinë e mësimit. Për të pasur akoma më shumë një arsim që ndihmon studentët tanë të përgatiten për një të ardhme të mirë”, tha Hajdari.
