Ish-kreu i SHISH, Fatos Klosi, ka deklaruar në studion e Report Tv, se argumenti i Metës nuk qëndron për të legjitimuar vendimin e shtyrjes së 30 qershorit, teksa ka ngritur dyshime për vërtetësinë e tij. Në emisionin “45 minuta”, ai tha se një informacion nuk duhej thënë në Komisionin Hetimor, e aq më tepër i pamjaftueshëm për të marrë vendimin për shtyrjen e zgjedhjeve të 30 qershorit. Ai u shpreh më tej se institucioni kryesor që furnizon me informacione që vijnë me rrugë sekrete është SHISH. Informacionin në fjalë mund ta ketë edhe policia, apo Bashkia, por nuk është trajtuar si duhet.
“Nuk e lidh dot djegien e Parlamentit me shtyrjen e zgjedhjeve. Këtu do i thoja “jo”. Nuk duhet ta kishte thënë këtë. Rreziku për Parlamentin ka qenë. Nëse policia nuk do ishte treguar e vendosur për ta mbrojtur, edhe mund ta kishin djegur më parë në protestat e kaluara. Sigurisht duhej bërë një akt vandalizmi që të diskutohet, se kështu do mbetej në vëmendje të njerëzve.
Institucioni kryesor që furnizon me informacione që vijnë me rrugë sekrete është SHISH, por këtë informacion mund ta ketë edhe policia, apo Bashkia, por informacioni nuk është trajtuar si duhet. Informacioni duhej shfrytëzuar për t’i dalë Zot të keqes, që të merreshin masa. Nuk dëgjova se Meta e ka çuar gjëkundi këtë informacion, nuk kam dëgjuar të ishte thënë një gjë e tillë. S’është ndonjë gjë sekrete, nuk të detyron njeri që të thuash burimin, por u tha vonë.
Më mirë do thosha po të isha këshilltar “Mos e thuaj, përmend të gjitha informacionet e tjera, po jo këtë”. Edhe nëse do digjej, do bëhet një tjetër më i mirë. Doli shumë vonë dhe ngre dyshim. Kush e di njeri tjetër këtë informacion përveç Metës?”, tha Klosi.
