Sot presidenti Meta u përball me Komisionin Hetimor Parlamentar, i cili është duke hetuar shkeljet e pretenduara të Kushtetutës. Mbrojtjen e çdekretimit të 30 Qershorit, kreu i shtetit e nisi duke sjellë në vëmëndje një vendim të gjykatës të së drejtave të njeriut në Strasburg.
Si një prej arsyeve themelore, presidenti renditi një informacion sekret për akte destabilizimi duke fajësuar indirekt opozitën.
Ai ka reaguar tashmë me anë të një postimi në rrjetet sociale, duke u shprehur se është i lumtur që iu dha mundësia të kthehet në Parlament, për të rikonfirmuar edhe njëherë se deri në 24 korrik 2022, Institucioni i Presidentit do të jetë një kështjellë në mbrojtje të Kushtetutës e demokracisë.
“Shumë i lumtur që m’u dha sot mundësia të kthehem në Parlament pas një mungese gati dy vjeçare, për të rikonfirmuar edhe njëherë se deri në 24 korrik 2022, Institucioni i Presidentit do të jetë një kështjellë e pamposhtur në mbrojtje të Kushtetutës, demokracisë, pluralizmit, interesit kombëtar dhe atij publik, me qëllimin e vetëm anëtarësimin e shpejtë dhe pa vonesa të Shqipërisë në Bashkimin Europian”.
