Një bandë kriminale, e drejtuar nga shqiptarë, është shkatërruar nga policia italiane. Kjo organizatë trafikonte kokainë nga Holanda në Romë, ndërsa në pranga kanë përfunduar 17 persona, të cilët akuzohen për trafik lëndësh narkotike dhe armësh.
Sipas mediave italiane, operacioni i koduar “Shqiponja e Zezë” është kryer nga skuadra e ndërhyrjes së shpejtë të policisë së Romës, e koordinuar nga Drejtoria Rajonale e Antimafias. Forcat e rendit kanë kryer një seri kontrollesh në banesa dhe ambiente të tjera të personave të akuzuar për trafik ndërkombëtar kokaine, por edhe armësh.
Raportohet se grupi është përgjegjës për trafikimin e tonelatave kokainë nga Holanda në Romë, si dhe në lokalitetet Tor Bela Monaka dhe San Bazilio, ku ndodheshin dhe bazat për ndarjen në doza për tregun kryeqytetas.
Po ashtu, janë sekuestruar 200 kilogramë kokainë, disa pistoleta dhe një armë automatike.
