Zbardhen detaje të reja sa i përket vrasjes së Festim Latos në Holandë, apo siç quhej ndryshe Presidentit i Vetëshpallur i Çamërisë.
Media e njohur holandeze, “De Telegraaf”, i ka kushtuar sot një artikull të gjatë ekzekutimit të shqiptarit, teksa ngre dyshime se vrasja e tij mund të jetë bërë për hakmarrje.
Në këtë artikull janë pasqyruar edhe dëshmitë e disa “viktimave” që pretendojnë se kanë rënë pre e mashtrimit të shqiptarit prej vitesh, pasi kujtojmë që Lato akuzohet se ka mashtruar me dhjetëra biznesmenë, një noter dhe disa ish-partnerë të tij.
Njëri prej sipërmarrësve që ka rënë pre e Latos ishte “Vincent”, i cili nuk tregon emrin e vërtetë nga frika e hakmarrjes. Për shkak të “qëllimeve të mira” të Latos, “Vincent” thotë se i ka dhënë “një shumë me pesë zero” atij, që i kishte bërë disa premtime.
“Ne shkuam në një takim ku tha se republika ishte themeluar dhe kjo ishte mjaft zyrtare, me diplomatë e njerëz me status”, tha ai.
Një tjetër ish-punonjës i Latos konfirmoi se “Vincent” ishte vetëm një nga shumë viktimat e mashtrimit.
Ai thuhet se ka pasur ‘të paktën shtatë milionë euro’ thotë një tjetër ish-punonjës, ndërsa në prill të këtij viti falimentoi.
Sipas “Vincent”, vitin e kaluar Lato ishte duke u ndjekur nga policia. Hetimi kishte nisur pas denoncimit të personave që Lato kishte mashtruar. Por një zëdhënës i policisë nuk pranon të komentojë.
Një “figurë mafioze”, thotë një tjetër.
“Ai gjithmonë kishte mijëra euro të gatshme”, thotë një tjetër.
Në shtëpi, Lato kishte një grup shqiptarësh të fortë rreth tij. “Dhe gjatë udhëtimeve ne ishim të shoqëruar nga truproja private të armatosura, qëndronim në hotele luksoze dhe lëviznim në Mercedes të blinduar”, thotë një holandez që ka punuar për të.
Ish-punonjësit thonë se Lato nganjëherë mbante një armë me vete dhe se ai dikur e ishte kërcënuar. Për vite të tëra, “luftëtari i lirisë” për Çamërinë, Lato, arriti të mbajë lart paraqitjet, thonë ish-punonjësit.
“Ai u bashkua me organizatat ndërkombëtare, organizoi konferenca dhe shkoi në Parlamentin Europian në Bruksel dhe Pallatin e Paqes në Hagë. Lato bënte shpesh foto para flamujve të vendeve evropiane dhe me personalitete”.
Drejtori i Pallatit të Paqes Erik de Baedts u shpreh se “Nuk e kemi njohur kurrë. Në qoftë se nuk do të kishte vdekur do të kishim marrë masa ligjore”, pas falsifikimeve të shumta që ai kishte bërë.
Një noter zbërthen akoma më shumë skemën e mashtrimit të Latos.
“Ky njeri ka shkaktuar shumë mjerim. Ai çoi shumë familje në humnerë financiare duke i mashtruar për Çamërinë. Ai kishte falsifikuar dokumentet zyrtare, për të bërë të duket se organizata e tij kishte miliona euro nga Bashkimi Evropian. Ai u kërkoi njerëzve dhjetëra mijëra euro. Njerëzit e përfshirë pastaj do të shpërbleheshin bujarisht për këtë. Në disa raste ai përfshiu njerëz të ndryshëm në dorëzani dhe i vuri nën kontroll”, thotë noteri, i cili shton se dëshiron të mbetet anonim për shkak të detyrës së tij të fshehtësisë.
“E kuptoj se paratë që ai vodhi shkuan në Shqipëri. Duhet të ketë miliona euro. Si vdiq ai? Duket shumë e mundshme që të jetë hakmarrje. Me sa duket ai u ngatërrua me personin e gabuar”, shton ai.
Festim Lato u varros sot në vendlindjen e tij në Vlorë.
