Në mbledhjen e zhvilluar gjatë ditë së sotme, Këshilli i Lartë Gjyqësor ka diskutuar mbi problematikën e krijuar për funksionalitetin e Gjykatës së Lartë. Zv.kryetari, Maksim Qoku tha se Organika gjyqësore e Gjykatës së Lartë përbëhet nga 19 anëtarë.
Sipas informacioneve të përcjella, 3 prej anëtarëve u ka mbaruar mandati para vettingut, 5 prej tyre iu është ndërprerë mandati pasi kanë hequr dorë. Ndërkohë 6 prej tyre janë shkarkuar nga detyra si pasojë e moskalimit të vettingut dhe një prej tyre nuk e ushtron detyrën prej angazhimeve në KLGJ. Kështu kanë mbetur vetëm 2 anëtarë, njërit prej të cilëve i ka mbaruar mandati ndërsa tjetri është akoma në pritje të vendimit nga KPA.
Për këtë arsye, KLGJ vlerëson se problemi më emergjent është të paktën formimi i një trupe me tre anëtarë për funksionimin e Gjykatës së Lartë. KLGJ mbetet i angazhuar për problematikën aktuale, bazuar në tre pika kryesore:
- Plotësimi përfundimisht i trupës së Gjykatës së Lartë
- Trajtimi i çështjeve të mbetura në gjykatë
- Shmangien e vonesave të shqyrtimit në këtë gjykatë
Qoku u shpreh se KLGJ ka detyrë të sigurojë funksionalitetin e Gjykatës së Lartë. Në mbledhjen e datës 5.7.19 u krijuan premisa për nisjen e garës për kandidatët jogjyqtarë në Gjykatën e Lartë.
KLGJ mundëson çeljen e garës për juristët më të spikatur që mbarti ekspertizën e nevojshme për t’u bërë pjesë e kolegëve të Gjykatës së Lartë, ndërsa u listuan edhe problematikat më emergjente:
Së pari, shqyrtimi i çështjeve në lidhje me kërkesat për ekstradim, të cilat në rast të tejkalimit të afateve sjell edhe shfuqizim të masës “arrest ne burg”
Së dyti, pamundësia e ankimeve të veçanta të gjykatave civile për kompetencë apo juridiksion.
Së treti, pamundësia e ankimeve të veçanta të gjykatave administrative për kompetencë juridiksion.
Së katërti, pamundësia e ankimeve te veçanta të gjykatave për kompetencë juridiksion.
Së pesti, pamundësia për të shqyrtuar kërkesat për mosekzekutim të vendimeve të formës së prerë, që mund të krijojnë efekte të pakthyeshme.
Së gjashti, eksodi i ankimeve që shkojnë në Strasburg pa u ezauruar në gjykatën e larte.
Së shtati zgjatja e proceseve.
Së teti, pamundësia për vendimeve që unifikojnë praktikën gjyqësore.
Në mbledhje Këshilli i Lartë Gjyqësor diskutoi edhe mbi mundësitë për nxjerrjen nga ngërçi të Gjykatës së Lartë, duke veçuar tre shtyllat kryesore:
- Skema e delegimit të gjyqtarëve.
- Aplikimi i transferimit të përkohshëm.
- Aplikimi i caktimit të gjyqtarëve në një çështje të caktuar
