Kreu i Grupit Parlamentar të PS-së, Taulant Balla ka folur rreth ndryshimeve në kod, duke listuar arsyet pse sipas tij janë të rëndësishme.
Nga foltorja e Parlamentit, Balla u shpreh se kemi nevojë për ndryshimet sa i përket të drejtës së autorit, ashpërsimin që lidhen me lojërat e fatit dhe ndryshimet që lidhen me qetësinë publike.
“Dënimin e çdo veprimi dhune, dhe parandalimin e dhunës në shoqëri kemi propozuar ashpërsimin e dënimeve ndaj dhunës, ndaj mjekut, polici, funksionarëve publikë, apo edhe ndaj të zgjedhurve, sikundër ka qenë rasti ndaj Kolegut Gjoni, apo edhe ndaj një kolegu të partisë së ballit kombëtar. Këto janë vepra që kushdo duhet të mbajë përgjegjësi penale. Kemi nevojë për ndryshime në kod, sa i përket të drejtës së autorit, së dyti për ashpërsimin që lidhen me lojërat e fatit, ky kuvend ka bërë një ndër gjërat më të mira në 28 vite, bllokimin e tyre që ishin bërë një mallkim për çdo lagje për çdo bllok pallati,ku burri dilte për të blerë bukë e paratë i linte në skedinë. Kjo betejë nuk është fituar ende si duhet se paligjshmëria duhet dënuar më ashpër se sa e sanksionon kodi penal. Së treti, ndryshimet në lidhje me qetësinë publike, janë pasojë e kërkesave të qytetarëve”, tha Balla.
Balla, më tej i drejtohet kryetarit të PD-së Lulzim Bashës, duke deklaruar se ky ndryshim do të sjellë dënimin për të gjithë individët që realizojnë akte vandale, siç ndodhën në protestat e opozitës.
“Sot po e bëjmë Lulzim për të garantuar që djali im e vajza jote të jenë më të sigurt në atë çfarë blejnë. Në shoqëri demokratike dhuna nuk tolerohet, dhe ky duhet të jetë qëndrim i palëkundur i këtij parlamenti. Përballë protestave të dhunshme që u regjistruan nga 16 shkurti dhe ne i kemi bërë të qartë që opozita ka të drejtë të protestojë, por me ndryshimet në kod, sa herë të vandalizohen institucionet, të shkatërrohet prona private, ka pasur e do ketë pasojë individuale ligjore me gjithë dhunuesit”, u shpreh Balla.
Ai shprehu bindjen e tij se presidenti i republikës, të cilën edhe një herë e quajti bashkëkryetar të opozitës në presidencë, do e kthejë për rishqyrtim në Kuvend.
“Nuk kam dyshim se Meta do na i kthejë për t’i votuar edhe një herë në shtator, si një prej bashkëkryetarëve të opozitës në Presidence, kur ktheu edhe ligjin që kujdeset për çdo lloj halli të shqiptarëve jashtë vendit, nuk kam asnjë dyshim se Ilir Meta nuk ka më vesh e sy se cfarë duan shqiptarët, ka vetëm sy e vesh për hallet e Lulit e Monikës.
Ilir Meta edhe po i kthen këto ndryshime, aq na bën, se me të nisur shtatori këtu do jemi do e votojmë. Aq më të rënda do jenë këto masa ndaj dhunës ndaj çdo mjeku e polici. Dënon nga gjoba deri 3 vjet burgim goditjen për shkak të detyrës. Kemi parë plot halabakë që dikur kanë mbajtur edhe mandat që i ngërdhesheshin me pa të drejtë policit në detyrë”, deklaroi Balla.
