Kryebashkiakja e Shkodrës, Voltana Ademi deklaron se ka depozituar sot në Prokurori kallëzimin penal për krimet elektorale, të kryera sipas saj, te votimet e 30 qershorit.
Nëpërmjet një postimi në Facebook, Ademi i bën thirrje Prokurorisë që të bëjë detyrën dhe të mos i nënshtrohet asnjë presioni politik, por të zbatojë vetëm ligjin.
Postimi i plotë:
Si zgjedhëse dhe kryetare e Bashkisë së Shkodrës, kam depozituar sot në Prokurorinë e Shkodrës kallëzimin penal për krimet elektorale të kryera të votimet e 30 qershorit.
Ashtu siç kam paralajmëruar edhe më herët, kam paraqitur të gjitha provat që vërtetojnë shkeljet e ligjit në një proces që nuk kishte asgjë të përbashkët me zgjedhjet.
Para mediave, i kam bërë thirrje prokurorisë të bëjë detyrën dhe të hetojë pa iu nënshtruar asnjë presioni politik dhe çfarëdo lloj tjetër dhe të zbatojë vetëm ligjin. Po ashtu, kam nënvizuar se qytetarët e Shkodrës dhe gjithë shqiptarët e meritojnë të mësojnë të vertetën dhe të shohin drejtësinë të bëhet realitet.
