Që prej nisjes së protestave për mbrojtjen e Teatrit, Elona Caslli ka qenë pjesë e pandashme e tyre. Është një prej aktivisteve më në zë dhe gjithmonë publikon shkrime therëse për problematika të ndryshme. Këtë herë nëpërmjet një postimi në “Facebook”, ajo i ka bërë thirrje shkrimtarit Ismail Kadare. Duke i kërkuar të mos vazhdojë me “përqeshjen” që po i bën Shqipërisë.
Caslli shkruan se e ka të vështirë t’i vihet shkrimtarit më të cilin Shqipëria identifikohet në spektrin kulturorë në të gjithë botën. Por, sipas saj Kadare është duke mbajtur një pozicionit të gabuar. Duke i kujtuar Kadaresë se çfarë ka shkruar ai dikur për Shqipërinë dhe si po vepron në ditët e sotme. Postimin e ka shoqëruar me dy foto, ku shihet Kadare nën shoqërinë e Elisa Spiropalit. Dhe në foton tjetër shihet së bashku me kryetarin e bashkisë Erion Veliajn.
Postimi i plotë:
Mjaft e përqeshët Shqipërinë Z. Kadare!
Nuk është e lehtë të kundërshtosh shkrimtarin që e ke fort përzemër.
Nuk është e lehtë të kundërshtosh dikë që ka ndikuar në mendimin dhe formimin tënd.
Nuk është e lehtë të kundërshtosh dikë që përfaqëson hartën kulturore shqiptare në Europë dhe më tutje.
Nuk është i lehtë kundërshtimi, por është akoma më e vështirë heshtja.
Lejomëni të sjell në vëmendjen tuaj një pjesë nga “ “Mosmarrëveshja”
Në sytë tanë do të shpaloseshin cinizmi dhe shpërfillja e kastës politike, mosmarrja seriozisht e shtetit dhe e kombit, çka do të çonte tek shkelja e çdo morali, te lidhja e zgjidhja e aleancave të paparimta, te tribalizimi, hedonizmi, pokerizimi në politikë e në jetë, gjersa përshkallëzimi i së keqes të arrinte një kulm të ri; përqeshjen me Shqipërinë.
Shkëputur nga – Mosmarrëveshja
Ju flisni për një kulm të ri. Ky kulm është përqeshja me Shqipërinë.
Unë atë përqeshje e ndiej në qëndrimin tuaj Z. Kadare.
Po qëndroni në anën e mbrapshtë të historisë dhe po e përqeshni Shqipërinë!
Unë nuk e di nëse Shqipëria e meriton dashurinë tuaj ose jo. Ndoshta mund të mos ta meritojë.
Por një gjë e di me siguri: Shqipëria nuk e meriton përqeshjen tuaj!
Së paku, mund t’i dhuroni heshtjen tuaj!
Post Scriptum- Në mbyllje më rivjen ndërmend një pohim krejt i vërtetë nga ju, i cili përshkruan kthjellët ëndrrën e çdo shqiptari që e do vendin e tij.
Në fund të fundit, padurimi për të qenë si Europa, nuk ishte gjë tjetër, veç një tjetër padurim; e duam Shqipërinë më të mirë se ç’është.
