Zëdhënësi i Presidentit të Republikës, Tedi Blushi, ka reaguar në lidhje me deklaratën e deputetes së PS-së, njëherësh edhe kryetare e Komisionit Parlamentar për Sigurinë Kombëtare, Ermonela Felaj, lidhur me letrën e Metës.
Në një intervistë për emisionin “Top Talk” në televizionin “Top Channel”, Felaj është shprehur se KLGJ, në raportin që i ka dërguar Kuvendit, ka gjetur një sërë shkeljesh të Këshillit të Lartë të Drejtësisë (KLD), nën kryesimin e kreut të shtetit.
“Në raportin e Këshillit të Lartë të Gjyqësorit janë gjetur një sërë shkeljesh të bëra nga Këshilli i Lartë i Drejtësisë, të cilin e drejtonte Presidenti”, ka thënë deputetja socialiste.
E pyetur se nëse këto gjetje të raportit, që përbëjnë sipas saj, shkelje të rënda të Kushtetutës, do të pasohen me arrestimin e Metës, Ermonela Felaj u përgjigj: “Jo domosdoshmërisht. Varet nga rasti që do të marrin në shqyrtim. Komisioni Hetimor do të raportojë nëse këto shkelje janë ose jo çështje penale”.
Zëdhënësi i Metës, ka një argument për këtë çështje: “Mungesa e vendosmërisë së hekurt revolucionare që shfaqi sot deputetja Ermonela Felaj, duke lënë një fije dyshimi që Presidenti i Republikës edhe mund të mos arrestohet, është një minë me sahat për “fitoren” përfundimtare të Reformës në Drejtësi!”, shkruan ai në Facebook.
