Deputetja demokrate Rudina Hajdari ka reaguar pas qëndrimit të presidentit Ilir Meta, kundër ambasadorëve të huaj në vendin tonë. Ajo shprehet se nuk mendonte se do të ishte dëshmitare në historinë postkomuniste të Shqipërisë, që një president shqiptar të sulmonte ambasadën e SHBA-ve dhe OSBE-në.
Ajo shprehet e turpëruar për këto deklarata, dhe i kërkon falje të gjithë diplomatëve për këtë çmenduri.
“Asnjëherë nuk mendoja se do të shihja një ditë në post-komunizmin e Shqipërisë, ku presidenti i vendit tonë do të sulmonte Ambasadën e Shteteve të Bashkuara dhe OSBE-në, dhe diplomatë të tjerë të nderuar.
Ky është një turp dhe ndjehemi të turpëruar. Kërkoj falje të gjithë diplomatëve tanë, për këtë çmenduri”, thekson Hajdari.
Sot kreu i Shtetit nuk la pa “fshikulluar” edhe përfaqësuesit diplomatikë të vendeve të ndryshme në Tiranë, duke u kërkuar të mos nëpërkëmbin Kushtetutën e vendit.
“I ftoj ndërkombëtarët të bëhen seriozë, të mos tallen me Kushtetutën tonë. U tallën në 2008-n me Kushtetutën tonë. Të mos bëjmë lojë ambasadash, unë i ftova në dialog dhe i vetmi që nuk erdhi. Do dialog, le t’i marrë ndërkombëtarët dhe të vijnë ose nëse s’vijnë, shkojmë ne atje, edhe në Amerikë se vizat ai i jep dhe i merr. Edhe për Kolegjin Zgjedhor, edhe për të gjithë.
Kush janë këta ambasadorë që thonë ti bëjmë zgjedhjet dhe pas korrikut, t’i shohë Gjykata Kushtetuese?”, tha Meta.
