Kryetari i Bashkisë së Kamzës Xhelal Mziu ka dhënë mëngjesin e sotëm një intervistë për gazetarin e Fax News, Sokol Dema. “Nëse do të jem apo jo unë kryetar nuk e vendos kjo e sotmja, pasi këto janë zgjedhje të Partisë Socialiste, këto janë zgjedhje pa dekret dhe antikushtetuese. Zgjedhjet janë në 13 Qershor, në historinë 30-vjeçare të pluralizmit askush nuk ka parë zgjedhje me 1 kandidat dhe komisione me përfaqësues të vetëm një partie.
Unë jam i bindur që këto zgjedhje nuk do të certifikohen ditën e nesërme”, u shpreh Mziu. I pyetur nga gazetari, nëse në orët në vijim do të ketë skenar nga PD për përplasje, Mziu nuk pohoi një gjë të tillë.
“Shumica e qytetarëve janë distancuar nga kjo farsë, dhe në këtë kuptim, nuk po merrem me përplasjet, pasi kjo i intereson vetëm një personi, që është kryeministri. Nuk na shërbejnë përplasjet me njëri-tjetrin, kryeministrit i ka interesuar ky proces që të heqë vëmendjen nga skandalet, veçanërisht pas përgjimeve, ku vetë ai dhe eksponentë të tij janë kapur duke blerë vota.
Ne sot thjesht po monitorojmë procesin, për të denoncuar dhe më shumë këtë farsë. Qytetarët e Kamzës janë përballur edhe me një ndryshim të qendrave të votimit, po nuk kanë interes për votimet, ky proces do të jetë grushti dërrmues ndaj këtij kryeministri”, tha më tej Mziu. Kryebashkiaku i Kamzës këmbënguli se zgjedhjet do të mbahen në 13 Tetor, dhe preferoi që të mos komentonte fare kandidatët në garë. Ai tha se pjesëmarrja në zgjedhjet në këtë zonë nuk do të jetë më shumë se 5%.
