Kreu i Partisë Demokracia Sociale, Paskal Milo, dhe njëherësh aleat i kryeministrit Rama ka folur pas takimit me kreun e Shtetit, Ilir Meta. Ai tha në një prononcim të shkurtër për mediat, se me rëndësi është që të gjendet gjuha e përbashkët, dhe që palët politike të ulen në një tryezë për gjetjen e një zgjidhje.
Milo nënvizoi se nevojitet urgjentisht gjetja e një zgjidhje, për të kapërcyer krizën që rrezikon të ardhmen europiane të vendit.
“Bëmë diskutim për gjetjen e një zgjidhje për krizën që po duket se po thellohet.
Refuzimi i ftesës nga Rama është çështje e kryetarit të Partisë Socialiste, unë jam kryetari i PDS-së dhe PDS respekton vendimin e Presidentit të Republikës.
E rëndësishme është të gjendet një gjuhë e përbashkët, dhe të ulen palët për gjetjen e një zgjidhje sa më shpejt të jetë e mundur.
Nuk di për një datë të re zgjedhjesh, por Presidenti i Republikës është në tagrin e tij ta bëjë një gjë të tillë”, tha Milo.
Një ditë më parë, kryeministri Edi Rama e refuzoi publikisht ftesën e kreut të Shtetit, duke u shprehur se ishte i zënë me fushatën.
