Ish-presidenti Alfred Moisiu ka shprehur shqetësimin e tij lidhur me krizën në vend. Në një deklaratë për mediat, Moisiu akuzoi palët politike për retorika që nxisin urrejtje mes shqiptarëve.
Duke iu referuar rëndësisë së marrjes së vendimit të KE-së për çeljen e negociatave, Moisiu bën apel që të zgjidhet kriza me anë të dialogut në interes të Shqipërisë.
Fjala e Moisiut:
Ministrat e Jashtëm të Këshillit të BE vendosën për të shtyrë në muajin tetor vendimin për mundësinë e hapjes së negociatave me Shqipërinë. Hapja e negociatave me BE është prioritet absolut kombëtar për vendin tonë. Në shtyrjen e tyre ka ndikuar hezitimi i disa vendeve anëtare dhe kriza politike në vend. hapja e negociatave në vend se të kuptohet si një çështje mes BE dhe vendit, po përdoret si instrument i luftës politike mes shumicës e pakicës. Koha deri në tetor është e shkurtër për të bindur vendet skeptike. Punët për t’u kryer nuk janë të pakta. Kriza po përkeqësohet.
Është koha për dialog politik, është koha për një zgjidhje në interes të Shqipërisë dhe jo në kurriz të saj. Koha për një zgjidhje afatgjatë për të mos u përsëritur krizat ciklike.
Ne besojmë se është e patolerueshme nxitja e urrejtjes mes shqiptarëve për interesa partiake të disa drejtuesve politikë, retorika denigruese nga secila palë politike. Mungesa e dialogut mes partive politike etj.
Gjithë këta faktorë kanë çuar në veprime nxitëse kundër shqiptarëve, veprime që bien ndesh me dëshirën për integrimin. Ata kanë vendosur interesat partiake mbi interesat e vendit. Ne vlerësojmë se kjo situatë duhet të marrë fund përmes një reformimi të thellë për integrimin. Propozojmë ndryshimin e sistemin zgjedhor, forcimin e kompetencave të institucioneve.
KQZ të zbatojë kërkesën ligjore për depolitizim.
