Komisioni i Ligjeve është mbledhur për të shqyrtuar kërkesën e 55 deputetëve të maxhorancës, për shkarkimin e presidentit Ilir Meta. Kujtojmë këtu faktin se presidenti Meta vendosi të shfuqizojë 30 qershorin si datë për zgjedhjet lokale, por mazhoranca e konsideroi këtë vendim si shkelje të rëndë të Kushtetutës.
Deputeti i Grupit Parlamentar të Pavarur, Ralf Gjoni, tha se kërkesa për shkarkimin e Metës është e nxitur. Sipas tij, kjo procedurë shkarkimi është një lojë politike, ndërsa është e pabazuar në Kushtetutë. Si për të vendosur pikat mbi ‘I’, Ralf Gjoni e cilësoi si një lojë që po përdoret për të bërë zhurmë mediatike.
“Mendoj se është i nxituar vendimi për të shkarkuar presidentin, pasi ende nuk kemi të bëjmë me një akt për të delegjitimuar Parlamentin. Mua më duket se kjo procedurë shkarkimi është një lojë politike që ju po bëni, dhe është e pabazuar në Kushtetutë. Është një lojë që po hapet për të bërë zhurmë mediatike”, u shpreh Gjoni.
Qëndrimi tij ka hasur në kundërshtim me deklaratën e deputetit socialist Bashkim Fino, i cili tha se vendimi i Metës përbën shkelje të rëndë të Kushtetutës.
“Presidenti ka marrë një copë letër, ka shkruar çfarë ka dashur, dhe i ka vendosur emrin dekret”, tha ai.
Sipas Finos, jemi përpara një shkelje të nenit 92 të Kushtetutës. “Ajo që më bën përshtypje është letra që presidenti i ka dërguar Kuvendit të Shqipërisë, për argumentet e ç’dekretimit. Gjuha e përdorur prej tij është ironike, paragjykuese dhe hipokrite. Jemi përpara një shkelje të nenit 92 të Kushtetutës, dhe me dhimbje kemi marrë këtë masë që po ia paraqesim Parlamentit”, tha Fino.
Deputeti tjetër socialist, Spartak Braho, theksoi se Komisioni i Ligjeve nuk merr vendim për shkarkimin e Metës, por për ngritjen e Komisionit Hetimor që do të përcaktojë nëse presidenti është ose jo në shkelje të rëndë Kushtetuese.
“Më vjen mirë që një koleg i joni, z. Fino, ndonëse ekonomist në profesion, paraqiti me kompetencë arsyet pse dekreti i presidentit është i pabazuar në ligj e Kushtetutë. Ndërkohë që vërej deputetë të tjerë nuk e kanë kuptuar akoma pse kanë ardhur sot. I dashur Ralfi, dekreti i presidentit nuk është llastik për të mbathura, që mund të hapet sa herë dhe sa të duash. Është shtyllë dhe neni 92/2 thotë; Presidenti i Republikës dekreton zgjedhjet. Nuk ka më as çdekret, as njoftim, as vendim. Çdekretimi që ai ka paraqitur nuk parashikohet fare në Kushtetutë.
Ne sot nuk jemi mbledhur për të shkarkuar presidentin, kuptoje dhe këtë, jemi mbledhur për të nisur një procedurë që do të konkretizohet me ngritjen e një komisioni hetimor, apo grupi hetimor, që do të konstatojë nëse është shkelje e rëndë apo jo dhe më pas do të vendoset. E kupton këtë që të them apo jo?.
Ralf Gjoni: E kuptoj shumë mirë, më mirë se ty z. Braho.
