Ish-kreu i Grupit Parlamentar i LSI-së, Petrit Vasili ka reaguar lidhur me ndryshimet në Kodin Penal për të gjithë ata që kryejnë krime zgjedhore, të cilëve do u ndalohet dalja jashtë shtetit për 5 deri në 10 vjet.
Përmes një postimi në “Facebook”, Vasili shkruan se kjo shtesë bie ndesh me Nenin 38 pika 2, ku përcakton se: “Askush nuk mund të pengohet të dalë lirisht jashtë shtetit.”
Sipas ish-deputetit, Rilindja kërkon që t’i pengojë e t’i izolojë shqiptarët nga bota dhe familjet e tyre që ndodhen jashtë vendit, teksa e konsideroi një krim të jashtëzakonshëm.
“Pra këta kriminele duan t’i pengojnë shqiptaret, qe te ndajnë gëzimet, hidhërimet dhe problemet shëndetësore me milionat e shqiptareve,familjare dhe miq te tyre, qe jetojnë jashtë Shqipërisë.
Ky është krim i jashtëzakonshëm, ndaj te gjithë duhet te jemi ne këmbe dhe te palëkundur deri ne fund, për te mbrojtur liritë tona themelore,qe janë liria e votës dhe e liria e lëvizjes, dy liri qe vetëm diktatura komuniste na i rrëmbeu për 50 vjet”, shkruan Vasili.
