Kreu i Partisë Demokratike, Lulzim Basha është shprehur se përgjimet e Bild dëshmojnë aleancën e Ramës me krimin. Në një deklaratë për mediat, Basha tha se “ky kancer i ka rrënjët e thella dhe se operacioni do jetë i tillë derisa të zhduket”.
Kreu i opozitës e cilësoi ministrin Lleshaj si një nga veglat më të ftohta e më të pashpirta të Ramës, i cili ka mision që të nxisë vëllavrasjen mes shqiptarëve.
Duke siguruar që të gjithë ata që kanë përdorur pushtetin në bashkëpunim me krimin, do të marrin ndëshkimin e merituar, Basha u bëri thirrje të gjithë shqiptarëve që të bashkohen në protestën e opozitës së bashkuar.
Fjala e Bashës:
Rama është timonieri i vjedhjes së zgjedhjes, çdo gjë ka ndodhur me planifikimin dhe kontrollin e tij. Nga përvoja e tij e gjatë e bashkëpunimit me kriminel dhe pastrues parash, ai ka fituar aftësinë si ta përdorë pushtetin që të punojë me kriminelët. Sikur u pa në Durrës e Dibër, sot krimi, qeveria janë kthyer në një sipërmarrje të përbashkët aksionere. Brenda saj, secili ka aksionet e detyrat e veta dhe merr pjesën e vet të përfitimit.
Përgjimet zyrtare të Prokurorisë tregojnë qartë se çfarë harmonie ka mes ministrit, deputetit, policit, kriminelit dhe biznesmenit.
E gjithë kjo është financuar nga paratë e drogës. Në Dibër policët ju kanë garantuar hapur të fortëve e kriminelëve se mund të mbillnin e kultivonin drogë. Nuk është rastësi që Habilajt raportojnë shifra që financonin në fushatën e PS-së.
I gjithë ky projekt, ishte një projekt shkatërrues për vendin sepse shkatërroi ekonominë dhe mundësitë për shqiptarët. Ekonomia shqiptare është bërë e varur nga droga, njësoj se Edi Rama me pushtetin e tij. Pasojat janë papunësia në nivele rekord, varfëria dhe depresioni ekonomik. Këto pasoja do të jenë akoma më të rënda nëse nuk e ndalojmë. Reagimi arrogant me përpjekje për ta normalizuar këtë situatë është përpjekje dëshpëruese. Dua t’i them që asgjë nuk do harrohet dhe gjithçka do të ndëshkohet. Asnjë hap politik nuk do bëhet pa patur në themel të saj ndëshkimin e gjithë atyre që kanë vjedhur votat e shqiptare. Asnjë marrëveshje s’do arrihet nëse pika nr.1 s’do jetë ndëshkimi i vjedhësve të votave.
Dua të them dy fjalë për ata që i shërbejnë Ramës. Nesër do ta provoni në palcë forcën e drejtësisë, çdo regjim diktatorial ka veglat e tij. Sandër lleshaj është sot vegla më e ftohtë dhe më e pashpirt e Ramës me misionin e tij për të nxitur vëllavrasjen, Lleshaj shkëlqen dhe duket i lumtur. Shumë shpejt ai do mbajë përgjegjësi. Në qelinë ku sot është Bardh Spahia, do jetë nesër njëri prej jush! Të gjithë ata prokurorë e punonjës që janë vënë në shërbim të Ramës, me qëllim vjedhje të zgjedhjeve, do mbajnë përgjegjësi para drejtësisë. Shqipëria ka nevojë për një operacion të thellë për të hequr këtë kancer të së keqes, dhe të thellë do ta ketë këtë operacion. Boll më me Shqipërinë si plaçkë e tyre, boll më me shqiptarët kokulur para tyre. Ju ftoj të bashkohemi pa dallime partiake nesër në orën 20:00 para Kryeministrisë. Zoti e bekoftë Shqipërinë dhe Zoti i bekoftë shqiptarët.
