Partizani ka prezantuar paraditen e sotme trajnerin e ri Franco Lerda, i cili ka pasur në krah drejtorin e përgjithshëm Olsi Rama. Ky i fundit ka marrë fjalën i pari, duke falënderuar trajnerin Gega dhe stafin e sezonit të shkuar për kontributin e dhënë për titullin kampion.
“Hapet një kapitull i ri, pas largimit të Gegës për arsye personale, në marrëveshje me klubin. Nisëm kërkimin, pamë shumë profile, trajnerë interesantë që do bënin mirë në Shqipëri, por për arsye të ndryshme zgjodhëm trajner Franco Lerda. Është trajner i ri, i cili ka bërë shumë mirë në karrierën e vet, duke trajnuar në Itali edhe emra të njohur për ne si Lecce e Torino. Jemi interesuar, kemi pyetur dhe jemi të kënaqur, sepse mendojmë se vizioni i tij do të jetë një vlerë e shtuar për Partizanin.
“Një trajner nga Italia, që ka drejtuar në nivele të larta, vjen me një bagazh të rëndësishëm taktik e teknik dhe do t’u japë një dorë lojtarëve për të vijuar rritjen, duke nisur nga Champions League. Pas kësaj konference do të nisem për të marrë pjesë në shortin e Champions, shpresoj që goglat të sillen mirë me ne. Sido që të shkojë, do të japim më të mirën ndaj çdo rivali. Ekipi do të niset për në Slloveni, ku do të qëndrojë për dy javë. Ekipi është i plotë deri diku, shumë lojtarë janë nga ekipi kampion, kanë ardhur disa të tjerë dhe presim ende përforcime”.
Më pas e mori fjalën Lerda, i cili tha fjalët e para si trajner i të kuqve.
“Është një kënaqësi që jam në Shqipëri, një vend afër Italisë edhe në nivel kulturor, përveçse gjeografik. Jam krenar që bëhem pjesë e projektit të Partizanit. E njihja Partizanin si emër, i ndjek kampionatet europiane në përgjithësi dhe e njihja Partizanin, raporton Telesport.
“Objektivat? Së pari është të përgatitim sa më mirë ndeshjet kualifikuese në Champions, në korrik. Objektivi parësor është të krijojmë një mentalitet, një stil, imazh të kësaj skuadre, nëpërmjet punës, aplikimit, idesë së futbollit që dua të fut në këtë ekip.
“Siç e thashë më parë, fakti që Partizani është ekip kampion më bën krenar. Synimi ynë është të konfirmohemi në krye, por secili ka stilin e vet të lojës, mënyrën e vet të përgatitjes së ndeshjeve, ndaj e di që është e vështirë të fitosh. I bëj komplimente trajnerit para meje, sepse ka fituar një titull që i mungonte prej shumë vitesh klubit.
“Trajnerët italianë dhe mungesa e suksesit në Shqipëri? Nuk mund të flas për ata para meje, edhe pse bashkëkombës, sepse secili ka mënyrën e vet të punës, stilit, përgatitjen e ndeshjeve. Në jetë nuk ka asgjë të lehtë, por projekti që më kanë ilustruar drejtuesit tregon që janë persona ambiciozë, ashtu si unë. I kemi mundësitë dhe kohën për të kaluar gjithë pengesat e mundshme që mund të kenë hasur paraardhësit e mi.
“Partizani kulmi i karrierës? Nuk e di, unë kam punuar edhe në Itali me futbollistë shqiptarë, si Memushaj e Çani. Përgjigjen e jep puna, përgatitja në fushë dhe ajo mendore, strategjia për të arritur ku duam.
“Merkato? Nuk kam asnjë emër, unë flas me Olsi Ramën. Di që kemi disa lojtarë që pritet të vijnë, kam besim tek ai. Nuk kam bërë asnjë kërkesë për ndonjë lojtar të veçantë.
“Frikë nga dështimi i mundshëm në Europë? Nuk kam frikë nga asgjë, dua thjesht të bëj punën time. Nuk shoh asnjë arsye për frikë, jam entuziast dhe optimist se do bëjmë gjëra të mira me këtë ekip.
Ndonjë kundërshtar i preferuar në short? Asnjë emër, janë të gjithë kundërshtarë të vështirë, por njëkohësisht të kalueshëm për ne. Fillimisht ideja jonë e lojës duhet të jetë e njëjtë për çdo rival”. /Telesport
