Sot zhvillohet provimi i tretë i maturës shtetërore, ai i lëndës së matematikës. Pak minuta pas fillimit të provimit, ish-deputeti i PD-së Luçiano Boçi ka postuar online fotot e tezës duke akuzuar kryeministrin Rama dhe ministren Shahini se këto teza janë bërë publike para se të fillojë provimi.
“Çfarë i ka ngelur Besës dhe Ramës për të thënë kur teza e matematikës del që në 10.00 ende pa filluar provimi?”, shkruan Boçi në postimin e tij.
Ish-deputeti thotë se kjo mund të quhet çfarëdolloj gjëje tjetër veçse Maturë Shtetërore duke kërkuar kështu edhe largimin e ministres Shahini, pasi sipas tij, qeveria po i merr në qafë maturantët.
“Fushatë karrigesh, gallatë arsimore, kënetë shkollash, tallje masive maturantësh, poshtërim dijesh…Por Maturë Shtetërore mos e quani më!Edhe asaj i keni dhënë pamjen e shëmtuar dhe përbuzëse të qeverisjes suaj! Besa largohu një orë e më parë… Maturantët nuk janë FBI-ja, por janë e ardhmja e vendit, të cilët sot ju po e merrni në qafë…”, shkruan ish-deputeti Boçi.
Ky nuk është rasti i parë i këtij lloj incidenti, pasi edhe 2 tezat e provimeve të mëparshme të zhvilluara nga maturantët dolën online në momentet kur po jepej provimi.
Postimi i plotë
Çfarë i ka ngelur Besës dhe Ramës për të thënë kur teza e matematikës del që në 10.00 ende pa filluar provimi?
Për cfarë do i flasin maturantëve këta derdimenë, dallkaukë e mashtruesë kalibri?!
Për meritë?!
Për drejtësi?!
Për cilësi?!
Pafytyrësia e tyre kalon çdo cak.
Apo për modelin e hajdutërisë, krimit, grabitjes së meritës, pelivanllëkut të poshtër që po e instalojnë që në gjenezë të brezave?!
Këtë po! Këtë e bëjnë çdo ditë me pasion.
Prandaj merreni këtë paçavure!
Merreni e quajeni si të doni.
Fushatë karrikesh, gallatë arsimore, kënetë shkollash, tallje masive maturantësh, poshtërim dijesh…
Por MATURË SHTETËRORE mos e quani më!
Edhe asaj i keni dhënë pamjen e shëmtuar dhe përbuzëse të qeverisjes suaj!
Besa largohu një orë e më parë…
Maturantët nuk janë FBI-ja, por janë e ardhmja e vendit, të cilët sot ju po e merrni në qafë…
