Kryeministri Edi Rama iu bëri thirrje bashkive të djathta që të mos bien pre e liderëve, dhe të mos zbatojnë dekretin e presidentit Meta, për anulimin e zgjedhjeve vendore të 30 qershorit.
Në lidhje më këtë, kryebashkiakët e PD-së i përgjigjen kryeministrit që këto akte ligjore janë të detyrueshme, pasi dekreti i Presidentit është botuar në Fletoren Zyrtare. Ndërsa i kërkojnë që t’i japë urdhër KQZ-së të shpallë menjëherë nisjen e negociatave me BE-në!
“Zoti Kryeministër, kur Presidenti të shpallë një datë të re zgjedhjesh, atëherë gatishmëria jonë për respektimin e ligjit, do të jetë, si gjithmonë, maksimale. Hallin e datës 30 nuk ta zgjidhim dot ne!”, thuhet në reagim.
REAGIMI I KRYEBASHKIAKËVE TË PD
Zoti Kryeministër! Je kokë e këmbë në paligjshmëri!
Qeveria e drejtuar prej teje ka botuar në Fletoren Zyrtare dekretin e Presidentit. Siç mund ta dish fare mirë, në Fletoren Zyrtare publikohen aktet ligjore të detyrueshme për zbatim në Republikën e Shqipërisë. Mos u lodh me urdhra pa vlerë që nxisin militantët e tu në KQZ të na kërcënojnë me ndjekje penale, sepse, për sa kohë nuk ekziston një datë zgjedhjesh, as zgjedhjet nuk ekzistojnë.
Kushdo që vepron ndryshe, është në paligjshmëri!
Zoti Kryeministër, kur Presidenti të shpallë një datë të re zgjedhjesh, atëherë gatishmëria jonë për respektimin e ligjit, do të jetë, si gjithmonë, maksimale.
Hallin e datës 30 nuk ta zgjidhim dot ne!
Je që je kot dhe sillesh nëpër Shqipëri si qyfyrexhi, jepi urdhër KQZ-së të shpallë menjëherë nisjen e negociatave me BE-në!
