Kryetari i Partisë Demokracia Sociale, Paskal Milo u shpreh i vendosur se ndërkombëtarët nuk do të rrinë “duarkryq”, ndërsa lajmëroi se nga java tjetër ata do të fillojnë të “rrahin fort sinjalet e alarmit”.
I ftuar në emisionin “Top Talk”, Milo deklaroi se ditën e djeshme ka takuar zv.ndihmës Sekretarin Amerikan të Shtetit, Mattheë Palmer në Prishtinë. Nga takimi i zhvilluar, ai zbuloi se Palmet pranoi që dekreti i Metës për të anuluar datën e zgjedhjeve vendore nuk është zgjidhje.
Ndërkohë, Milo shtoi se SHBA dhe BE do të monitorojnë situatën deri në fund të javës.
“Ndërkombëtarët kanë dashur që ngjarjet në Shqipëri, mbështetur edhe nga përvoja e hidhur e së kaluarës, të mos japin shanse të përsëritjes së krizave të thella politike dhe sociale në Shqipëri. Nuk besoj se ndërkombëtarët do të rrinë duarkryq. Deri më tani ata kanë dërguar mesazhe të tilla për gjetjen e konsensusin.
Dje kam takuar Palmerin në Prishtinë dhe bisedova me atë për disa minuta. I shpreha shqetësimin për rolin që duhet të luajnë SHBA për zgjidhjen e krizës në Shqipëri. I fola për dekretin e Presidentit. Ai pranoi që është thjeshtë një dekret por nuk është zgjidhje, ashtu sikurse palët duhet të ulen vetë. Po rrinë e po shikojnë pozicione të ngurtësuara. Ata deri më tani do të jenë monitorues të situatës deri në fund të javës dhe jo vetëm ata, por edhe vendet anëtare të Bashkimit Evropian. Nga java tjetër do fillojnë që të rrahin fort sinjalet e alarmit. Ky është një dështim për politikën shqiptare”, tha Milo.
