Ditën e sotme u zhvillua provimi i parë i Maturës Shtetërore, ai i lëndës së anglishtes. Ish-kryeministri Berisha nëpërmjet disa fotove të shpërndara në rrjetet sociale akuzoi se këto teza u ishin shpërndarë nxënësve në qytetin e Kukësit për favorizime politike.
Sipas Berishës, nxënësve në Kukës po iu bëheshin lëshime kundrejt votës.
Nuk ka vonuar edhe përgjigja e Ministrisë së Arsimit e cila i është përgjigjur këtyre denoncimeve si dezinformime që dalin nga anëtarët e PD-së.
“Periudha e maturës shtetërore përballet çdo vit me lajme të rreme për keqadministrim të testit nga ana e MASR. Këto dezinformime dalin kryesisht nga anëtarë të PD duke e përshirë edhe këtë proces plotësisht teknik, por të rëndësishëm për nxënësit, në betejën e ulët politike të opozitës”, shkruhet në postimin e MASR.
Sipas Ministrisë së Arsimit kjo nuk është diçka e re dhe thekson se ata do të vazhdojnë të përmirësojë testin dhe administrimin e procesit deri në digjitalizimin e plotë të tij.
Reagimi i plotë:
Periudha e maturës shtetërore përballet çdo vit me lajme të rreme për keqadministrim të testit nga ana e MASR. Këto dezinformime dalin kryesisht nga anëtarë të PD duke e përshirë edhe këtë proces plotësisht teknik, por të rëndësishëm për nxënësit, në betejën e ulët politike të opozitës.
Kjo nuk është aspak një gjë e re! Sa më rigoroz është testi dhe administrimi nga ana e MASR, aq edhe më të shpeshta janë dezinformimet e tyre, të cilat i dënojmë fuqishëm!
MASR nënvizon se do të vazhdojë të përmirësojë testin dhe administrimin e procesit deri në digjitalizimin e plotë të tij. Ky vit ka ardhur me risi sepse një pjesë e testeve do të vlerësohen për herë të parë elektronikisht duke shmangur gabimet njerëzore që mund të jenë bërë në vitet e kaluara, ndërkohë që janë shtuar edhe penalitetet për ata që do të mundohen të kopjojnë.
Njëkohësisht, falënderojmë edhe Policinë e Shtetit për ndihmën e saj në ruajtjen dhe shpërndarjen e testeve dje dhe sot.
Suksese të gjithë maturantëve në vijim për provimet e rradhës!
