Kryeministri Edi Rama ka deklaruar se nuk mban përgjegjësi se çfarë diskutojnë disa “plehra” në telefon. Sipas tij, përgjimet e publikuara nga gazeta gjermane nuk janë të plota.
“Nuk merrem me plehra unë. Se çfarë flasin ca plehra në telefon me njëri-tjetrin unë nuk mbaj përgjegjësi. Kjo është një indicie dhe unë prandaj thashë e neveritshme. Përgjimet janë copëza dhe duhet të ketë një arsye që kjo botë përgjimet i konsideron indicie jo si prova”, tha Rama.
Ndër të tjera, Rama shtoi se nuk ka shit-blerje votash, ndërsa pretendon se nuk ka provë që grupi kriminal në përgjime të ketë marrë favore nga Bashkia Durrës.
“Shitje dhe blerje votash, nga ato qe kanë dalë në përgjime, nuk ka. Nuk ka asnjë fakt që ky grup kriminal të ketë marrë ndonjë favor nga Bashkia e Durrësit”, deklaroi Rama.
Po ashtu, kreu i qeverisë i quajti përgjimet si përralla të opozitës.
