Ministri i Brendshëm, Sandër Lleshaj, në një intervistë të dhënë për DW, me theks të veçantë tek përgjimet, është i mendimit se kjo nuk e prish imazhin e vendit. Pas skandalit të publikimit të përgjimeve Dako – Avdylaj nga “Bild”, të gjithë njerëzit e mazhorancës janë hedhur në sulm për të zbuluar dhe fajësuar të gjithë ata prokurorë që kanë kaluar nëpër duar dosjen e nxehtë 339, nga e cila kanë ‘rrjedhur” bisedat për blerjen e votave. Nga ana tjetër, opozita i ka vendosur me shpatulla pas murit pas këtyre fakteve skandaloze. Por ministri Lleshaj është i mendimit se është ende herët për të dalë tek konkluzionet, pasi sipas tij, i bëjnë dëm të gjithë procesit.
“Unë nuk besoj se një publikim i tillë prish imazhin e Shqipërisë, sepse Shqipëria është më e madhe sesa një rast i shkëputur i publikimit të një përgjimi të caktuar.
Këtë dua ta ndaj, sigurisht që asnjë lajm sado i vogël të jetë që s’është pozitiv, po besoj që çështja ka nevojë të merret me qetësinë e duhur, sepse bëhet për një çështje e cila është në proces hetimor. Kjo është një rrjedhje e paautorizuar, nga një proces hetimor në zhvillim.
Nuk duhet të kërcejmë tek konkluzionet shumë herët, sepse i bëjmë dëm të gjithë procesit”.
Përgjimet vënë në dukje lidhjet direkte që Astrit Avdylaj, kreu i grupit, mbante me kryetarin e Bashkisë së Durrësit Vangjush Dako, por dhe me kandidatin aktual të Partisë Socialiste për Bashkinë e Shijakut, Elton Arbana.
TIRANA TODAY
