Policia italiane ka arrestuar 17 pjesëtarë të një organizate kriminale aktive ndërmjet Shqipërisë dhe Trentonit, ndërsa 1 person është shpallur në kërkim.
Sipas policisë droga blihej në “dark web” (pjesa e internetit ku shfaqen të gjitha faqet dhe informacionet që nuk pranohen të shfaqen në botën e internetit që ne njohim.) dhe rishitej me çmimin 100 euro për gram. Ndërsa përsa i përket dërgesave në shtëpi, duhet të paguaje çmimin shtesë prej 500 eurosh.
Pjesë e kësaj organizate ishin edhe minorenë, ndërkohë mësohet se nga të 17 të arrestuarit, të paktën 8 prej tyre janë shqiptarë. Hetimet e këtij operacioni nisën që në vitin 2017 me sekuestrimin e disa sasive të drogërave sintetike të blera në “dark web”.
Pas më shumë se një viti hetimesh, policia italiane ka dokumentuar më shumë se 1,500 artikuj të drogës që përshkruajnë një shoqatë kriminale, e cila synon trafikimin e drogërave të natyrave të ndryshme, kryesisht kokainë dhe marijuanë të një cilësie të lartë.
Droga blihej nga Evropa veriore, kalonte nëpër Shqipëri dhe baza ishte e vendosur në Brescia. Çdo gjë ishte drejtuar nga një 34-vjeçar, i cili është edhe personi i shpallur në kërkim.
Organizata kriminale që me shitjet e saj të kokainës së pastër dhe drogërave të tjera sintetike kishte arritur deri në Trentino, u ndalua nga policia në kuadër të operacionit të saj të titulluar “Postalmarket”.
