Prej ditësh në rrjetet sociale po qarkullojnë pamjet e një gruaje rome, e cila akuzohej se në të vërtetë ishte mashkull dhe që rrëmbente fëmijët.
Por, policia e Kosovës ka reaguar duke bërë verifikimet përkatëse, teksa u shpreh se në fakt nuk ka asnjë denoncim dhe se gruaja në fjalë nuk paraqet rrezikshmëri për komunitetin.
Por, publikimi i saj në rrjetet sociale ka nxitur dhunën, duke sjellë sot një rast të rëndë në mes të Ferizajit.
Gruaja rome ishte duke ecur kur sulmohet nga një djalë, i cili e godet atë në kokë.
Lidhur me rastin ka reaguar edhe ambasadorja e Kosovës në SHBA, Vlora Çitaku, e cila rrëfeu se si gruaja rome diskriminohej në shkollë derisa u detyrua ta lërë atë.
Lidhur me sulmin, ambasadorja shprehet se ky është një turp që bie mbi të gjithë shoqërinë.
Reagimi i plotë i ambasadores Vlora Çitaku:
E kam pasë në klasë Nurijen dhe Fitimin. Nurija dhe Fitimi gjithmonë janë ulur në bankën e fundit, edhepse mësuesja kërkonte t’i ulte me ne. Po ne, i tallnim. Nuk ua jepnim dorën. Nuk i preknim. Nuk luanim dhe nuk flisnim me ta. I tallnim.
Nje ditë kur Nurija u sëmur dhe nuk erdhi në shkollë për disa javë, mësuesja jonë menxi na mblodhi disa shokë të klasës që të shkojmë ta vizitojmë.
E di edhe e mbajë mend se sa shumë mundohej mësuesja jonë që të na bindte të rrimë dhe të loznim me ta. Besa, edhe na ndëshkonte kur na shihte që po i sulmojmë apo përqeshim.
Nurija dhe Fitimi e ndërprenë shkollën. Se ne ua bëmë të padurueshme.
Sot, fëmijët tanë po i rrahin në rrugë Nurijen, Fitimin, dhe fëmijët e tyre.
Turpi qoftë mbi ne.
