Dy orë para protestës, vjen tjetër apel nga Ambasada Amerikane në Tiranë. Kjo e fundit, në një postim në faqen e saj zyrtare në Facebook, u bën thirrje pjesëmarrësve në protestë që të përmbahen dhe të qëndrojnë larg dhunës.
Më tej, ambasada paralajmëron se ata që përfshihen në akte dhune, do të vihen para përgjegjësisë.
Deklarata e plotë:
Shtetet e Bashkuara respektojnë të drejtën demokratike të qytetarëve për të protestuar në mënyrë paqësore. Ju bëjmë thirrje të gjithë pjesmarrësve në protestën e sotme – si qytetarëve ashtu edhe forcave ligjzbatuese – që të përmbahen duke qëndruar larg dhunës. Nxitja e përplasjeve fizike apo hedhja e mjeteve plasëse, bombave molotov dhe gurëve, është jodemokratike dhe e paligjshme. Ata që përfshihen në akte dhune kryejnë një krim dhe duhen vënë përpara përgjegjësisë. Shtetet e Bashkuara nxisin të gjitha palët të tregojnë vetëpërmbajtje, të refuzojnë dhunën dhe të përfshihen në një dialog konstruktiv.
