Një ushtarake shqiptare humbi jetën, dhe 3 të tjerë mbetën të plagosur, gjatë shpërthimit të një mine, të cilën ata po e demontonin në Letoni. Viktima, Zarife Hasanaj, ishte pjesë e grupit xhenier, për demontimin e minave luftarake në vendin balltik.
Çminimi i hapësirave ku dikur janë zhvilluar konflikte, mbetet ende një nga sfidat më të mëdha që ka bota. Vlerësohet se në botë, janë ende aktive 110 milionë mina tokësore. Numri më i madh i tyre ndodhet në Egjipt (23 milionë), Iran (16 milionë) dhe Angola (9-15 milionë). Këtu ndodhin edhe 85 përqind e aksidenteve me viktima nga këto armë të tmerrshme.
Prodhimi i një mine, kushton vetëm 3-30 dollarë, ndërsa kostoja e demontimit të tyre është 300-1000 dollarë. Me një llogaritje të thjeshtë, kostoja e demontimit të të gjitha minave ekzistuese, është 50-100 miliardë dollarë. Por kostoja më e rëndë, është në humbje jetësh njerëzore.
Për çdo 5 mijë mina të demontuara me sukses, humb jetën 1 ekspert xhenier, dhe plagosen 2 të tjerë. Minat vrasin më shumë se 5.000 njerëz në vit, teksa plagosin dhe lënë të gjymtuar 15.000-20.000 të tjerë. Deri kohët e fundit, teksa demontoheshin 100.000 mina në vit, vendoseshin rreth 2 milionë të tjera.
Nëse vazhdohet me ritmet aktuale dhe nuk vendosen më mina të reja, do të duhen 1100 vjet për zhdukjen e të gjitha minave tokësore aktive në botë./ Tirana Today
