Ish-kryeministri Sali Berisha i ftuar në emisionin “360 Gradë” në RTV Ora deklaroi se beteja e opozitës do të shkojë në përplasje të fuqishme sepse mjete e tjera opozita i ka ezauruar të gjitha.
“Kjo është një betejë që padiskutim do të shkojë në një finale. Dhe nga kjo betejë nuk shoh zgjidhje veç një përplasje shumë të fuqishme. Kjo është një betejë në të cilën janë konsumuar mjete të tjera. Është konsumuar sepse ka pasur një marrëveshje të 2017 e cila në vend që ti jepte vendit paqen që meritonte për shkak të zgjedhjeve, i dha dosjen 339 dhe 182,” u shpreh Berisha.
Berisha la të kuptohej se nuk ishte pishman që kishte hequr dorë nga drejtimi i PD-së.
Pjesë nga biseda në studio:
Dyrnjaja: A e kishit rrëzuar Ramën më shpejtë se Lulzim Basha sot nëse do ishit në krye të PD-së me gjithë këto skandale që përmendni?
Berisha: Unë nuk mund të them kurrë më, ah sikur të isha edhe njëherë. Sepse kam dhënë një dorëheqje me ndërgjegje të plotë dhe as në një të qindtën e sekondës nuk e përfytyroj vetën sikur të isha më.
Dyrnjaja: Por vendimi kryesor i opozitës për djegien e mandateve është nga ju?
Berisha: Jo. Të jesh i bindur.
Dyrnjaja: Ju e keni artikuluar i pari dhe i vetmi.
Berisha: E ka artikuluar, por nuk është i imi.
Dyrnjaja: Ju e imponuat atë zoti Berisha me autoritetin që keni.
Berisha: Nuk është dhe nuk mund të ishte kurrë sepse për një vendim kaq të rëndësishëm nuk mund të nxisja një grup. Unë nuk jam në drejtim prandaj nuk e kam vendosur unë.
