Në një bashkëbisedim pedagogë dhe përfaqësues të arsimit të lartë në vend, kryetari i Partisë Demokratike, Lulzim Basha tha se universitetet në vend janë në krizën më të thellë në 29 vjet.
Basha theksoi se për fat të keq Shqipëria po njeh një fenomen tepër të rëndë dhe ai është braktisja masive e shkollave e universiteteve në vend. Basha nënvizoi se nxënës e studentë po braktisin vendin për të ikur jashtë, pasi këtu ka humbur shpresa.
“Arsimi i lartë gjendet sot në krizën më të thellë dhe të rëndë në 29 vjet. Ka pasur një krizë të madhe në financim në arsimin e lartë. Që nga viti 2013, ka pasur gjithmonë dhe më pak investime në arsim të lartë. Buxheti për Arsimin e Lartë nuk shkon për infrastrukturë universitetesh, por për të rregulluar zyrën e ministrit të Arsimit dhe zyrave qendrore të MAS.
Këta vite ka ndodhur një fenomen i tmerrshëm. Ky fenomen është braktisja masive e arsimit, sidomos atij të lartë nga shqiptarët. Ata zgjedhin të largohen jashtë vendit.
Gjithashtu, arsimi i lartë është përfshirë nga llumi, balta dhe korrupsioni. Ne do të bëjmë përpjekje, ne si PD së bashku me partnerët tanë ndërkombëtarë europianë, që të nxjerrim arsimin e lartë nga kjo llucë e korrupsion ku është mbërthyer”, deklaroi lideri demokrat Lulzim Basha. Ai shtoi se Rama po konsolidon pushtet në arsimin e lartë edhe jashtë ligjeve.
