Gazment Bardhi ka shuar dyshime se PD dhe kryeministri Rama po dialogojnë për të arritur një zgjidhje të situatës politike. Sekretati i Përgjithshëm i PD-së pohoi se asnjë drejtues i PD nuk ka asnjë kanal komunikimi me kryeministrin Rama. Duke e bërë Ramën shkaktar të krizës politike, Bardhi tha se nuk do të ketë një gjë të tillë, për aq kohë sa Rama do të jetë në krye të qeverisë.
“Ajo që unë mund të pohojë është që Basha dhe asnjë drejtues i PD nuk ka asnjë kanal komunikimi me Edi Ramën, asnjë marrëveshje sa kohë që ky është kryeministër i Shqipërisë. Sepse situata ku ndodhet vendi është për shkak të këtij njeriu. Do duhet të largohet Rama dhe më pas duhet të shkojmë drejt zgjidhjes”, tha Bardhi në ‘5 pyetje nga Babaramo’.
Bardhi e ka cilësuar rolin e presidentit Meta në zgjidhjen e krizës politike, si të domosdoshëm. Numri dy i PD, tha se në një kohë kur institucionet drejtësisë kanë rënë, presidenti është i vetëm institucion demokratik që funksionon.
“Ka përgjegjësi për funksionimin e institucioneve të shtetit shqiptar. Kur rrezikohen zgjedhjet e lira dhe të ndershme, presidenti ka një rol për të luajtur. Shqipëria është pa prokuror, pa gjykatë të lartë, pa organet e rëndësishme të drejtësisë, pa kryetar të Kontrollit të Lartë të shtetit. Në këtë drejtim, roli i presidentit është gjithnjë e më i rëndësishëm. Vetëm presidenca është funksionale, institucionet e tjera të demokracisë kanë rënë. Roli i Metës është i domosdoshëm”, tha Bardhi.
