Opozita e bashkuar ka paralajmëruar përshkallëzimin e aksionit opozitar. Protesta ditën e sotme nuk do të zhvillohet para Parlamentit, por do të përqendrohet në 5 akse rrugore kryesore, duke i mbajtur të bllokuara për më shumë se 60 minuta.
Protesta e opozitës do të mbahet pasditen e sotme në orën 18:00, ndërsa qytetarët do të vendosen për të bllokuar lëvizjen përkatësisht në rrethrrotullimin e Bradasheshit në Elbasan, autostradën Plepa-Kavajë në Durrës, kryqëzimin e Milotit në Lezhë, rrethrrotullimin e Sheqit në Fier, dhe rrethrrotullimin e Shqiponjës në Tiranë.
Ky nuk është rasti i parë që opozita vendos të zbatojë forma të mosbindjes civile. Në prill 2017, opozita bllokoi sërish akset kryesore në vend në kërkim të zgjedhjeve të lira dhe të ndershme, ndërkohë që në prill 2018 demokratët ishin në rrugë duke kundërshtuar vendosjen e taksës në Rrugën e Kombit.
Protestat e sotme të opozitës vijnë 48 orë pas një marrëveshjeje të gjerë, ku koalicioni opozitar firmosi për të mos hyrë në zgjedhjet vendore pa largimin e Kryeministrit Rama dhe krijimin e një qeverie tranzitore. Kryetari i opozitës, Lulzim Basha, është shprehur i bindur se në 30 qershor nuk do të ketë zgjedhje, pasi opozita nuk do të lejojë më që të ketë procese farsë të diktuara nga krimi.
“Kjo fillon pikësëpari duke i dhënë fund krimit elektoral, zgjedhjeve false. Angazhimi i parë dhe kryesor i koalicionit opozitar, që është maxhoranca e re politike, morale dhe numerike e Shqipërisë, është që të kthejë vendimmarrjen në duart e shqiptarëve. Kurrë më nuk do të pranojmë një proces zgjedhor fals, të diktuar nga krimi, që prodhon Parlament fals, kukull, të interesave kriminale të oligarkisë, qeveri false, vegël të interesave kriminale të oligarkisë që grabisin pasuritë e shqiptarëve. Do të angazhohemi fuqimisht përmes aksionit tonë të përbashkët, që zgjedhjet e ardhshme të jenë zgjedhje të lira dhe të ndershme, në të cilat të diktojë vullneti i qytetarëve shqiptarë”, deklaroi Basha pas nënshkrimit të marrëveshjes me aleatët.
