Ish-deputeti i PD-së, Enkelejd Alibeaj, teksa është fokusuar tek partia e re, e udhëhequr nga deputetja Rudina Hajdari, tha se krijimi i të tilla partive politike janë brenda logjikës demokratike. Ai shtoi se në këtë rast mungon morali politik.
“Asnjë lloj komenti. Në parim mund të them: shumë mirë që pas viteve ‘90, u arrit mundësia që kush do mendon se mund të formojë parti, mund të garojë. Në planin politik, emrat që ju sapo thatë, deri dje ishin njerëz të zgjedhur prej demokratëve. Para se të jesh politikan, duhet të jesh i moralshëm. Iu ke thënë njerëzve se do jesh përfaqësues i juaj, por morali i përfaqësimit politik mungon në këtë rast”, tha Alibeaj.
I ftuar në emisionin “Kjo javë” në “News 24”, Alibeaj nuk hezitoi të pranojë se gjithmonë kanë marrë mësime. “Gjithmonë ka pasur situata të tilla, ka pasur mësime të nxjerra nga mësimet. A nuk është mirë që partitë të mos funksionojë si garnizone të mbyllura?! Më mirë kështu. Dhe këtu nuk ka asgjë për t’u shqetësuar. Edhe nga e majta do ishte mirë të kishte parti të tilla, po ky është një defekt i madh i tyre, ku një renegati që del kundër ‘i pritet koka’”,u shpreh më tej ai.
