Në super grabitje u shënua mesditën e djeshme në vendin që konsiderohet më i sigurti, në aeroportin “Nënë Tereza”. Katër persona të kamufluar me veshje komandoje dhe të armatosur, kanë hyrë në ambientet e brendshme të aeroportit, ku kanë bërë të mundur grabitjen e parave që do të transportoheshin jashtë vendit.
Grabitësit kanë marrë paratë e tre bankave të nivelit të dytë që operojnë në vendin tonë. Të mirëinformuar se në orën 15:00 bankat e nivelit të dytë do të transportonin një sasi të konsiderueshme valute drejt Austrisë, të armatosur me armë tip kallashnikov, granata dhe të veshur me kostume kamuflazh, grabitësit kanë vënë në jetë planin e grabitjes.
Hetimet për grabitjen e ndodhur këtë të martë në aeroportin e Rinasit i kanë kaluar tashmë Prokurorisë së Krimeve të Rënda në kryeqytet.
Ngjarja u hetua fillimisht nga dy prokurorë të Tiranës, Kreshnik Ajazaj dhe Ndini Tavani, por procedurat do të ndiqen në vijim nga Krimet e Rënda.
Sa i përket ngjarjes, burime policore thonë se makina e përdorur rezulton të jetë e vjedhur në Laç. Ndërsa grabitësit, siç shprehen ato, kanë vepruar me një disiplinë ushtarake.
Personi që shkëmbeu zjarr me policinë kishte detyrë të digjte makinën me logon “Hetimi Tatimor”, ndërsa 3 të tjerët janë larguar me një furgon tjetër, që e dogjën në Kamëz.
