Bujar Kapexhiu ka ndarë disa momente pikante të jetës së tij, teksa ka qenë i ftuar në emision “Rudina” në “Klan”. Artisti Bujar Kapexhiu tha se në kohën kur është martuar, ka qenë punëtor llaçi, pasi Partia Komuniste e kishte dërguar për riedukim pas Festivalit të 11-të. Ai kishte qenë në survejim gjatë periudhës kur ishte bërë dasma, ndaj i kishte kërkuar nuses që të mos vishej me të bardha. Por kërkesa e tij kishte shkuar në vesh të shurdhër, pasi bashkëshortja e tij ishte veshur me një fustan të bardhë.
“Kjo fotografi është e vitit 1975, në atë kohë unë punoja në llaç, sepse pas Festivalit të 11-të partia më dërgoi për riedukim. Isha pa edukatë në atë kohë. Por ishte caktuar dita e dasmës dhe duhej të martohesha, dhe gruaja ime nuk po martohej me një regjisor, por me një punëtor.
Në atë kohë ishte i ndaluar fustani i bardhë, mbajtja e unazës, lyerja e buzëve dhe unë duke qenë se isha në survejim, i thash edhe gruas: “Të lutem mos vish fustan të bardhë, sepse mua më ndjekin”. Sepse po të shihnin që unë si i përndjekur dhe i paedukuar shkoja merrja nusen me fustan të bardhë, do të rëndohej situata. Por ajo me qetësinë më të madhe dhe me një buzëqeshje të lehtë më tha: “Unë një herë martohem”. Dhe gruaja ime ishte e bindur që një herë do martohej”, tregoi Kapexhiu.
