Pas gati tetë orësh seancë maratonë tek Gykata e Krimeve të Rënda, ish-ministri i Brendshëm, Saimir Tahiri, tha se është i pafajshëm dhe se do të kërkojë drejtësi. Duke apeluar që çështja të mos zvarritet, ai tha me ironi se ka pak raste kur drejtësia bën drejtësi.
“Ky nuk është sistemi i drejtësisë për të cilin unë luftova, por do të ndjek të gjitha etapat për të kërkuar drejtësi, dhe për të fituar pafajësinë time”.
Kështu u shpreh ish-ministri i Brendshëm, pas vendimit të Gjykatës së Shkallës së Parë për Krimet e Rënda, për të çuar për gjykim dosjen “Tahiri”, me të pandehur vet ish-ministrin dhe 3 zyrtarë të tjerë policie.
“Deri më tani, gjatë hetimeve kemi dëgjuar dhe kam dëgjuar vetëm çfarë ka thënë Prokuroria. Tani do të flas edhe unë, por për këtë ju kërkoj të bëni durim, sepse kur nxirrni gjëra më të rëndësishme nga errësira, që ua sigurojnë prokurorët, nuk keni për ta pasur të vështirë të merrni prej meje ato që doni të dëgjoni”, tha më tej ai.
“Kërkova që gjykimi të mos jetë një histori zvarritjeje pa fund, edhe pse kam më shumë për të pretenduar sesa Prokuroria. Do të vazhdoj të argumentoj deri në fund se s’kam lidhje me këtë çështje, duke ndjekur me përpikmëri çdo fazë të gjykimit. Drejtësia prandaj është e bukur, për ato pak raste kur bën drejtësi”, deklaroi Saimir Tahiri.
Ai u shpreh i keqardhur për të gjithë shqiptarët që u duhet të përballen me këtë drejtësi. “Sot e tutje do të flas në gjykatë dhe për publikun, sepse ky nuk mund të jetë më një proces i mbyllur. Ky proces i ka kapërcyer kufijtë e një maskarade, është i gjithi një absurditet”, u shpreh Tahiri.
“Në këtë vend, për 25 vite kanë qeverisur njerëz që kanë vjedhur dhe kanë vrarë, ndërsa unë as nuk kam vjedhur, dhe as nuk kam vrarë ndonjë. Do t’ia dal deri në fund. Unë jam prapë ministri kampion, se gjithçka kam bërë për policinë, nuk e kthej mbrapsht”.
