Ditën e nesërme, simpatizantët e opozitës do të mblidhen para Parlamentit për të protestuar kundër qeverisë.
Sipas ‘Shqiptarja.com’ nesër do të jenë në gatishmëri mbi 700 forca policie dhe FNSH, ndërsa Parlamenti dhe Kryeministria do të rrethohen me gardh metalik, si ditën e shtunë.
Ish deputeti i PD, Klevis Balliu në protestën e banorëve të Astirit deklaroi se do të jetë fundi i kryeministrit Edi Rama.
“I bëj thirrje çdo qytetari të vijë nesër në protestë për t’ia rikthyer Parlamentin qytetarëve shqiptarë, nesër do të jetë fundi i bandës së Edi Ramës, fundi i oligarkëve, Parlamenti është i qytetarëve. Edi Rama hapi veshët, hapi sytë, e ke të gjithë popullin në rrugë, mos i provoko se do të të tërheqin zvarrë”, tha Balliu.
Opozita ka deklaruar se protestat para Parlamentit do të vijojnë sa herë që të ketë seanca plenare.
