Ditën djeshme në komunën e Tuzit në Malin e Zi janë zhvilluar zgjedhjet. Prej ku fitues u shpall koalicioni i partive shqiptare me kryesues Nik Gjeloshaj. Shumë emigrantë shqiptarë u rikthyen në Tuz për të hedhur votën e tyre. Këto janë zgjedhjet e para pas hyrjes në fuqi të ligjit që mundësoi krijimin e Komunës së Tuzit vitin e kaluar, duke e ndarë atë nga Podgorica.
Kështu Alternativa Shqiptare, Unioni Demokratik dhe Lidhja Demokratike të bashkuar me emrin “Malësia na bashkon”, morën 16 mandate nga 32 që ka komuna e Tuzit ndërsa pritet qe edhe një nga social demokratët e Milo Gjukanoviç të kalojë me koalicionin shqiptar duke përbërë kështu shumicën absolute.
Ish-ministri i Jashtëm Kastriot Islami nëpërmjet një intervistë për Tirana Today thotë se ky rezultat ka ardhur pikërisht prej bashkimit të shqiptarëve, si dhe jep një mesazh për drejtuesit e rinj
“Ky është një sukses që ka ardhur për shkak të bashkimit të faktorit shqiptar. Pra, është dhe një mesazh për shqiptarët kudo ku janë në vende të tjera. Nëse duan të maksimalizojnë suksesin, duhet të bashkëpunojnë midis tyre.
Siç u bashkuan për të fituar, duhet të bashkohen edhe për të qeverisur komunën e Tuzit. Sepse sfida më e madhe është tani pasi kanë garantuar fitoren, për të vazhduar të aplikojnë rregullat e demokracisë. Duke respektuar parimet e demokracisë, por edhe të bashkëjetesës multi-etnike. Sepse jo të gjithë qytetarët e Tuzit janë shqiptarë.”
Duke folur për situatën politike Islami shprehet se ashtu si Shqipëria dhe Mali i Zi janë duke u përballur me një zemërim të qytetarëve. Kjo pasi sipas tij këto vende nuk janë më demokratike, por kanë qeverisje autoritare.
“Ka pasur shumë shkrime në mediat e huaja, ku flitet për një ‘pranverë ballkanike’. Në to pasqyrohet pikërisht një zemërim i akumuluar i qytetarëve. Konkretisht të Malit të Zi, në Shqipëri dhe në Serbi. Shkaku lidhet me qeverisjet autoritare, pasi nuk bëhet më fjalë për demokraci. Por, ka elementë të korrupsionit, krimit e klientelizmit.
Liderët autoritarë të këtyre vendeve janë përgjegjësit kryesor. Madje në këto shkrime bëhet përgjegjës dhe Brukseli, i cili ka mbyllur sytë dhe i ka bekuar këto liderë. Për shkak se ka një qasje që tashmë po konsiderohet jo e saktë, po i japin më shumë rëndësi integritetit sesa demokracisë.”./ TIRANA TODAY
