Federata Shqiptare e Futbollit ka dalë në një konferencë në lidhje me rastin e dhunës në Kamëz ndaj gjyqtarit Eldorjan Hamiti. Ishte sekretari i përgjithshëm, Ilir Shulku ai që në fjalën e tij kërkoi me çdo kusht rikthimin e policisë në stadiume, ndryshe vazhdimi i garës do të jetë në pikëpyetje.
“Policia nuk ka reaguar në lidhje me incidentet në stadiumet shqiptare, edhe pas reagimeve të FSHF. Kërkuar ndërhyrjen e policisë pas ndeshjes së parë, ku luhej Skënderbeu dhe Partizani. Diçka e tillë ndodhi edhe javën e kaluar edhe ku u godit fotografi i Flamurtarit, nga tifozët e Partizanit.
Edhe media e ka kërkuar diçka të tillë, por asnjë reagim nga shteti. Kush do i mbrojë lekët e këtyre presidentëve? Nuk është marrë asnjë masë nga organet shtetërore. Në ndeshjen e fundit, u bë një “show” nga ana e policisë, por tifozët u futën në fushë, duke takuar lojtarët e tyre.
Tani lind pyetja, është i interesuar shteti dhe policia, që futbolli të vazhdojë punën në kushte normale? Në këto kushte është e vështirë të vazhdohet.” – deklaroi Shulku.
Do e ndërprisni kampionatin?
Për sa kohë thirrjet tona do shkojnë në vesh të shurdhër, që situata të mos agravohet, ne do e shohim me seriozitet vazhdimësinë e garës. Ne e kemi kundërshtuar ligjin që kur është hartuar, në lidhje me largimin e Policisë nga stadiumet shqiptare.
Deri kur do rezistoni pa policinë në stadiume?
Prandaj po e bëjmë këtë. Duam takime me drejtues të policisë, dhe nëse kjo punë vazhdon kështu, do e shohim me seriozitet.
Në raste të tjera kur janë dhunuar arbitrat, nuk e keni bërë kaq të madhe?
Shiko, rasti i ndonjë guri të hedhur, apo një boçe pishe, ka pasur dhe do të ketë, edhe në vende jashtë. Ato raste nuk paralelizohen me dhunën e djeshme. Janë krejtësisht të kundërta.
Do luhet këtë javë?
Do e shikojmë me shumë seriozitet reagimin e Policisë. Do e shikojmë me kujdes vazhdimin e kampionatit.
Stadiumet nuk janë të gjithë me kushte…
Nuk mund të themi që për ato kushte që janë, nuk do luhet. Me ato kushte, ekipet do luajnë në atë kategori përkatëse.
Përveç tifozëve, edhe presidenti Qarri ka dhunuar. Ai është anëtar në federatë…
Masat për raste të tilla duhet të jenë të forta dhe ekstreme. Që ky futboll të vihet në shina, të kthehet policia, dhe gara të vazhdojë normalisht. Në rast të kundërt, vihet në pikëpyetje vazhdimësia e garës.
