Në fjalën që mbajti në Samitin e dytë të Diasporës në Tiranë, shefi i qeverisë nënvizoi faktin se tanimë ka ikur koha kur drejtësinë e caktonte partia. Ai premtoi çuarjen deri në fund të reformës në drejtësi. Duke qëndruar në të njëjtën linjë, kryeministri tha se gjyqtarët dhe prokurorët e kanë mbajtur Shqipërinë si pronë private.
“Sot na duhet që të vijojmë të ecim në rrugën që kemi nisur, sepse po flasim për shtet-bërje dhe jo për të ngrënë darkë e pirë raki.
Ne do të flasim për luftën më të madhe, të vërtetë, që i është hapur korrupsionit në Shqipëri. Po si luftohet korrupsioni? Kjo luftohet duke ndërtuar një sistem drejtësie, që t’i ndjekë atë këmba-këmbës.
Gjyqtarët dhe prokurorët e kanë mbajtur Shqipërinë si pronë private, dhe pronat e shqiptarëve i kanë bërë lesh e li. Hap pas hapi po ndërtohet drejtësia, duke larguar llumin nga sistemi i drejtësisë.
Asnjë shqiptar nuk do të këtë paqe, deri ditën që do të shoh politikanë dhe vendimmarrësit, që kanë bërë punë dhe pazare të paraqiten para drejtësisë. Koha kur drejtësinë e bënte partia ka vdekur në vitin 1990. Kjo është koha për të ndërtuar një sistem drejtësie, ashtu si nga vendet nga ku ju keni ardhur”, tha Rama.
