Kryedemokrati Basha ka zhvilluar një takim me strukturat në Shkodër, ndërsa është ndalur tek qëndrimi i delegacionit të PE, se kriza politike mund të dëmtojë hapjen e negociatave dhe se djegia e mandatave nuk është rruga e duhur për zgjidhjen e problemeve. Ai shmangi deklaratat e ndërkombëtarëve, ndërsa shtoi se do të luftojnë për vlerat e Evropës. Por, sipas tij, rrugën drejt Evropës e pengon krimi dhe korrupsioni.
“Nuk komentoj kurrë deklaratat e miqve të huaj. Kemi 3 dekada që udhëtojmë drejt Evropës. Ky është një rrugëtim i dhimbshëm, por është rruga e vetme që do ta çojë Shqipërinë në Evropë dhe drejt mirëqenies.
Në këtë rrugëtim është radha jonë të bëjmë këtë sakrificë, sepse ne luftojmë për vlerat e Evropës. Rrugën drejt Evropës e pengon krimi dhe korrupsioni. Nuk shkohet me gënjeshtra, por me vlera. Pengesa kryesore për integrimin në BE është Shqipëria si Kolumbia”, tha Basha.
