Sikundër ishte njoftuar ditë më parë, pak çaste më parë ka nisur takimi i delegacionit të PE-së me kryetaren e LSI-së, Monika Kryemadhi dhe kryetarin e PD-së, Lulzim Basha. Takimi në fjalë po mbahet tek zyrat e BE-së, në Tiranë. Delegacioni i PE-së përbëhet nga 7 eurodeputetë.
7 eurodeputetët e Komisionit të Punëve të Jashtme të Parlamentit Europian, do të diskutojnë mbi krizën politike në Shqipëri.
Kreu i delegacionit dhe Eurodeputeti i Partisë Popullore, Tune Kelam, i ka kërkuar qeverisë dhe opozitës që të zgjidhin këtë situatë me anë të dialogut konstruktiv.
“Ne dënojmë me forcë retorikën politike që nxit dhunën, dhe i kërkojmë opozitës që të riangazhohet me jetën parlamentare. Qeveria dhe opozita duhet ta kapërcejnë këtë situatë nëpërmjet dialogut konstruktiv”.
Në Shqipëri ata parashikohet të takojnë presidentin Ilir Meta dhe kryeministrin Edi Rama. Pas Shqipërisë, 7 eurodeputetët do të udhëtojë drejt Shkupit.
