Incidenti në përballjen me Flamurtarin, ku tifozët zbritën në fushë dhe sulmuan fotografin e vlonjatëve nuk ka kaluar pa u ndëshkuar. Partizani është ndëshkuar nga Disiplina për dy ndeshje pa tifozë dhe një gjobë monetar. Administratori Olsi Rama pas këtij vendimi është shprehur se këtë sezon është shtuar dhuna dhe vandalizmi në futboll.
Ai thekson se Partizani e konsideron të nevojshëm rikthimin e uniformave blu në stadiume dhe se kompanitë private nuk ofrojnë siguri.
“Ne jemi dakord që të rikthehet policia në stadiume. Vetë fakti që këtë sezon në Kategorinë Superiore aktet e dhunës dhe vandalizmit janë shfaqur më shumë se vitet e fundit, tregon se kompanitë e sigurimit nuk garantojnë dot mbarëvajtjen e ndeshjeve. Infrastruktura e stadiumeve tona lë shumë për të dëshiruar në këtë drejtim dhe kjo e bën të pamundur që një stjuart i papajisur me mjete parandaluese të garantojë sigurinë.
Neni 51, paragrafi 1 i ‘Ligjit për Sportin’ Nr 79/2017 thotë shprehimisht: ‘Ruajtja e rendit dhe e sigurisë publike në mjediset sportive është detyrë institucionale e organeve të Policisë së Shtetit’. Paragrafi 2 parashtron përgjegjësitë që kanë klubet organizatore, por nuk përjashton prezencën e policisë në mjediset sportive. Duke qenë se ligji nuk e përjashton mundësinë, por në fakt e detyron Policinë e Shtetit për ruajtjen e sigurisë publike në mjediset sportive, një kthim i forcave policore brenda stadiumeve është jo vetëm i pranueshëm, por dhe i nevojshëm”, deklaroi Rama.
