Deputeti grek Giorgos Koumoutsakos është kundër çeljes së negociatave Shqipëri-BE. Partia më e madhe opozitare greke, “Demokracia e Re”, thotë se Greqia nuk duhet të japë miratimin e saj, për çeljen e negociatave të anëtarësimit të Shqipërisë në BE.
Duke shfrytëzuar mbledhjen e fundit të Këshillit Kombëtar të Politikës së Jashtme, një organ ku marrin pjesë gjithë partitë parlamentare, ai dha deklaratën ‘bombë’. “Nëse do të kishim diskutuar për këtë çështje, unë do të kisha theksuar se Greqia nuk duhet të japë miratimin e saj, për çeljen e negociatave të anëtarësimit të Shqipërisë në BE”, u shpreh më tej deputeti konservator grek.
Sipas tij, ky duhet të jetë një qëndrim i qartë i Athinës. “Qëndrimi i qeverisë shqiptare kundrejt minoritetit grek në Shqipëri, por edhe në çështje të tjera të marrëdhënieve dypalëshe, në raport edhe me situatën aktuale politike në atë vend, duket ta shpjerë qeverinë greke në vendimin për mosdhënien e miratimit në samitin e qershorit. Ky është një qëndrim konstant i “Demokracisë së Re”, tha Giorgos Koumoutsakos.
